講道：鄭英兒牧師

經文：路加福音12：13～21

主日：2024年4月21日

　　根據2024年4月7日世界衞生組織（WHO）最新的統計，對2020年年初到現今5年來，全世界人類有775,293,630確診COVID-19，這其中亦造成7,044,637人死亡！當咱基督徒佇咱清楚的信仰告白，確信創造主上帝呣那創造宇宙萬物，閣卡重要咱相信全世界人類攏是上帝所創造！無論是基督徒、回教徒、佛教徒、道教徒、任何宗教信仰的人、沒宗教信仰的人、甚至反對基督信仰的人，全世界每一個人的生命攏是主上帝創造閣疼惜的，亦攏是上帝看做寶貝！

　　咱心內有真大的一個問題，為什麼上帝容允COVID-19這個呣知按怎產生的傳染病，閣沒法度有藥物通治療的傳染病，造成全人類的艱難、痛苦及目屎？為什麼上帝容允704萬人（3個台北市的人口）的生命死亡，因為這個傳染病離開親人、朋友、家庭、社會及國家？

　　上帝的主權及旨意佇咱人類面對忽然間的災難及困苦，當咱看見自己的親人、朋友、國家及人民面對死失的時陣，咱攏啲問上帝：為什麼？

　　其實上帝看到每一個人類生命的死亡，祂亦啲做伙艱苦流目屎！

　　總是上帝有祂特別對咱提醒「堅持順服上帝主權」的信仰課題！

　　今早起通過路加福音12章13～21節，耶穌親自的提醒及宣告，互咱做伙學習「堅持順服上帝的主權」。

1.真實承認人類本性的自私及驕傲：

　　路加福音12章13～21節的標題：「無智慧的財主」。這位財主、好額人（富人），為什麼是無智慧？當他事業成功，產業豐收的時，真自然的想法及計劃就是閣卡大的發展及理想！原來的倉庫沒夠用，起造閣卡大的倉庫嘛是應該的啊。好額的財主亦認為自己已經積聚真多財產及物資，以後的人生通清閒好好享受自己打拼努力的成果。

　　沒想到耶穌的譬喻中，上帝竟然對好額財主講：「戇人！今暝就欲收回你的性命；你所積聚的一切欲留互啥人？」為什麼好額人沒得到耶穌的肯定及鼓勵？ 耶穌通過譬喻啲提醒咱人著真實承認自己本性的自私及驕傲！親像這位好額人仝款，他非常確信自己的努力及成就，他有充分的自我認同及自我肯定，他是現今個人主義及成功主義的典型代表！

　　但是耶穌欲指出好額人完全忽略上帝的恩典及賜福！好額人的眼中只有自己完全沒上帝！好額人只有想到自己，攏沒思考上帝賞賜這呢多的財富，是呣是啲提醒他需要用行動去關心、疼惜艱苦的生命？上帝的賞賜是呣是要求咱有閣卡需要關心的社會責任？

　　聖詩22首「主上帝正手」，提醒咱基督徒人生應該行的路。第3節歌詩真著驚告白：「主上帝正手佇咱中間攻擊，攻擊嫉妒、貪戀、怨恨；咱自私及自利，咱驕傲及不義，佇主上帝正手攏受攻擊。」

　　耶穌時刻啲提醒咱基督徒人性的軟弱、自私自利及驕傲！

2.歡喜告白上帝權能的救恩及盼望：

　　使徒保羅佇羅馬書1章16～17節清楚告白講：「我無看福音做見笑，因為此個福音是上帝的大能力，欲拯救所有信的人，代先猶太人，後來外邦人。因為此個福音有啓示上帝的義，此個義對頭到尾攏是通過信來得著。照聖經所記載：「義的人會對信來活。」保羅原來是非常反對基督信仰的人；總是上帝特別的救恩臨時他，引導他相信確認耶穌基督死佇十字架的救恩，互他及基督同死同復活；閣保守他後來的人生堅持成做「基督福音的勇士」盡忠到死！

　　1517年馬丁路德發起「第2次宗教改革」，他就是根據羅馬書1章16-17節保羅清楚的信仰告白提出「因信稱義」的主張！

　　全世界長老教會及改革宗的創始者加爾文，他亦是根據羅馬書1章16-17節保羅的信仰告白，提出「上帝絕對的主權」的信仰主張！

　　咱攏及馬丁路德、加爾文仝款，咱沒機會亦沒可能看到2000年前的耶穌，沒辦法看見受釘死十字架，3日後復活的耶穌！咱亦沒相片、影片通證明受釘死閣復活的耶穌！

　　咱只有通過咱的「相信」確定2000年前沒罪的耶穌，卻擔當全人類（包括你及我）的罪過受釘死十字架；全能的上帝互耶穌死後3日復活！

　　今日咱只要「相信」就通過「上帝權能的救恩」互咱「因信稱義」通及耶穌「同死同復活」並得著「永生的盼望」！

　　加爾文所寫的聖詩113首「我來朝見祢，救贖我的主」，第3節的歌詞清楚告白講：「祢就是活命，阮對祢生存。」第5節的歌詞，加爾文進一步告白講：「除去祢以外別位無盼望，主祢有應允，所信無空空。」

3.盡力成做敬虔、謙卑、順服的基督門徒：

　　當咱繼續研讀路加福音12章22～31節，咱就看見耶穌對「無智慧的財主」提出的結論及建議就是「信靠上帝」！ 路加福音12章31節耶穌宣告講：「顛倒著代先追求伊主權的實現，諸個物件就會攏續互恁。」佇馬太福音6章33節耶穌仝款對門徒及跟隨他的人宣告講：「著先追求伊的主權及伊的旨意實現，諸個物件就會攏續互恁。」

　　2000年來的教會及基督教徒，咱上重要的使命就是「堅持順服上帝的主權及旨意」！咱的生活所需要的一切，上帝必然攏賞賜互咱夠頟沒欠缺！

　　保羅佇羅馬書14章17-18節非常清楚告白講：「上帝主權的實現，呣是靠飲食，是靠聖神所賜的公義、和平及歡喜。用按呢來服事基督的人會互上帝歡喜，嘛會得著人的稱讚。」保羅期待並要求基督徒，無論佇什麼時代，面對任何處境，攏必須要倚靠聖神同行的信心及氣力，互咱的社會、國家以及全世界，真正有上帝賞賜的公義、和平、喜樂及平安！

　　耶穌佇馬可福音8章36-37節提醒講：「人得著全世界煞喪失家己的生命有什麼利益？人會當用什麼代價來交換家己的性命？」所以耶穌佇馬可福音8章34節對門徒及群眾清楚宣告講：「欲隨我的人，著完全否定家己，夯家己的十字架來隨我。」

　　保羅佇哥林多前書11章1節清楚提出他人生上重要的信仰告白講：「恁著學我，親像我學基督！」

　　願上帝保守賜福咱的一生攏盡力打拼成做敬虔、謙卑閣順服的基督門徒！

　　20多年前，感謝偕林波士通過家族捐贈500萬股東元電機的股票互總會，後來總會成立「財團法人台灣基督長老教會宣教基金會」，每年通過這些股票的股息大約140-150萬元，通成做總會各項事工的支持！

　　每年4月第3主日是「總會大衆傳播中心奉獻主日」，請咱關心、支持為「傳播基金會」奉獻及代禱，佇現今新媒體時代，通過優質影音上線，時時傳揚基督信仰，成做台灣國家及人民盼望的記號！